Më 25.08.2026, në disa lokacione në Shtip dhe Probishtip, nëpunës policorë nga stacionet policore për sigurinë e trafikut rrugor zhvilluan aktivitete parandaluese për siguri në trafik. Në Shtip, aktivitetet u zhvilluan nën moton „Mos përdor celularin gjatë drejtimit të automjetit“, ku drejtuesve të automjeteve iu shpjegua legjislacioni lidhur me detyrimin e tyre, si drejtues, për të mos përdorur celularin gjatë drejtimit të automjetit. Ndërsa në Probishtip, aktivitetet kishin për temë rritjen e sigurisë së çiklistëve dhe drejtuesve të trotinetëve elektrikë. Drejtuesve iu shpërnda material edukativ me përmbajtje të dobishme lidhur me ndryshimet ligjore dhe iu shpjegua se trotinetin elektrik mund ta drejtojë personi që ka mbushur 18 vjet. Gjithashtu, atyre iu prezantuan dispozitat dhe rregullat ligjore për pjesëmarrjen me biçikletë në trafikun publik, përkatësisht detyrimi për mbajtjen e helmetës mbrojtëse.
Më 25.08.2026, Seksioni për Parandalim pranë SPB Kumanovë gjithashtu realizoi një fushatë parandaluese për siguri në trafik, me moton „Sigurt me motor, trotinet dhe biçikletë“. Drejtuesve iu bë apel për sjellje të ndërgjegjshme në trafik dhe për mbajtjen e detyrueshme të pajisjeve mbrojtëse, si dhe iu shpjeguan pasojat ligjore të mosrespektimit të ligjit.
Më 25.08.2026, në territorin e Stacionit Policor Karposh, Njësia për Parandalim pranë SPB Shkup, në bashkëpunim me Këshillin Republikan për Siguri në Komunikacionin Rrugor, zhvilloi një sërë aktivitetesh parandaluese për siguri në komunikacion. Qëllimi kryesor ishte rritja e kulturës së sigurisë te qytetarët, si dhe forcimi i besimit dhe bashkëpunimit ndërmjet policisë dhe qytetarëve.
Gjatë aktivitetit, përmes komunikimit të drejtpërdrejtë me të gjithë pjesëmarrësit në komunikacion, përfshirë drejtuesit e automjeteve, atyre iu theksua nevoja për respektimin e plotë të rregullave dhe dispozitave të komunikacionit.
Ndërkohë, sot nëpunës policorë të NJPB Negotinë dhe Njësia Policore Çashkë zhvilluan aktivitete parandaluese për mbrojtje nga mashtrimet telefonike dhe mbrojtje nga zjarret në ambiente të hapura. Në kuadër të aktiviteteve në Negotinë, qytetarëve iu dha këshilla që të jenë gjithmonë të kujdesshëm gjatë komunikimit me persona të panjohur dhe të mos japin të dhëna personale apo të dhëna nga kartelat e tyre të pagesës, në mënyrë që të mos bëhen viktima të këtij lloji mashtrimi. Në Çashkë, qytetarëve iu theksua nevoja për bashkëpunim më të madh dhe raportim në kohë të çdo sjelljeje të papërgjegjshme, hedhjes dhe djegies së mbeturinave, si dhe ndezjes së zjarreve, veçanërisht në ambiente të hapura dhe pranë zonave pyjore, me qëllim mundësimin e reagimit të shpejtë dhe në kohë nga të gjitha institucionet.
