Sot (25.06.2026), nëpunës policorë nga Seksioni për Parandalim pranë SPB Veles, në rajonin e Velesit, realizuan aktivitet parandalues me temën “Ka ndihmë për një jetë pa dhunë”.
Përmes komunikimit të drejtpërdrejtë, qytetarët u informuan për dukuritë e dhunës në familje, të drejtat dhe masat mbrojtëse në rast të paraqitjes së ndonjërës prej formave të dhunës në familje, si dhe për mënyrat e njohjes së saj dhe veprimet që mund të ndërmarrin nëse gjenden në situatë të jenë dëshmitarë të ndonjë forme dhune. Theks i veçantë iu kushtua procedurave dhe veprimeve në raste të tilla, si dhe shërbimeve të disponueshme për ndihmë, mbrojtje dhe strehim të përkohshëm, duke u potencuar rëndësia e raportimit me kohë të të gjitha formave të dhunës.
Qëllimi i aktiviteteve është veprimi parandalues për të penguar shfaqjen e kësaj forme dhune dhe inkurajimi i viktimave që çdo rast dhune ta paraqesin me kohë në polici. Në kuadër të aktivitetit u shpërnda edhe material edukativ.
Gjithashtu, nëpunës policorë nga Njësia Policore për Sigurinë e Komunikacionit Rrugor Kavadar, në Kavadar, realizuan aktivitet parandalues nga fusha e sigurisë në komunikacion, ku përmes komunikimit të drejtpërdrejtë me drejtuesit e automjeteve u theksua nevoja për respektimin e rregullave dhe rregulloreve të komunikacionit, me theks të veçantë në detyrimin e përshtatjes së shpejtësisë së lëvizjes me kushtet e komunikacionit dhe gjendjen e rrugëve.
Nëpunës policorë nga Njësia për Parandalim pranë SPB Shkup, Seksioni për Parandalim pranë SPB Tetovë dhe NjPB Probishtip, në Shkup, Tetovë dhe Probishtip, realizuan aktivitete parandaluese të dedikuara për drejtuesit e motoçikletave, trotinetëve elektrikë dhe biçikletave. Gjatë aktiviteteve, drejtuesit u rikujtuan për rregullat dhe detyrimet për pjesëmarrje të kujdesshme dhe të përgjegjshme në komunikacion, veçanërisht për detyrimin e mbajtjes së helmetës mbrojtëse. Në Shtip, aktivitetet parandaluese ishin të orientuara në informimin e qytetarëve për pasojat që mund të shkaktohen nga përdorimi i telefonit celular gjatë drejtimit të automjetit.
Me këto aktivitete edhe një herë u theksua nevoja për ngritjen e kulturës së komunikacionit tek pjesëmarrësit në komunikacion, përmes respektimit të rregullave të komunikacionit dhe sjelljes së përgjegjshme, me qëllim mbrojtjen e sigurisë së tyre, të familjeve të tyre dhe të pjesëmarrësve të tjerë në komunikacion. Në kuadër të aktiviteteve u shpërnda edhe material edukativ.
Në Berovë, ndërkaq, sot nëpunës policorë nga Stacioni Policor Berovë realizuan aktivitete parandaluese të fokusuara në parandalimin e zjarreve dhe prerjes së paligjshme të pyjeve. Gjatë bisedave me qytetarët, nëpunësit policorë theksuan nevojën për kujdes dhe përgjegjësi maksimale ndaj fondit pyjor. Gjithashtu, qytetarët u informuan se prerja e paligjshme e drunjve dhe shkaktimi i zjarreve përbëjnë vepra penale që sanksionohen në përputhje me ligjin. Qytetarëve iu shpërnda edhe material edukativ i shtypur, i përgatitur në bashkëpunim me NP “Pyjet Nacionale”.
Nëpunës policorë nga SPB Shkup sot realizuan një takim pune në Komunën e Haraçinës me përfaqësues të komunës, ku temë diskutimi ishin masat dhe aktivitetet për parandalimin e zjarreve, si dhe masat për përballimin e dhunës ndërmjet bashkëmoshatarëve, ruajtjen e rendit dhe qetësisë publike dhe rritjen e sigurisë në komunikacion.
