Sot (04.08.2026), nëpunësit policorë të Njësisë së Sigurisë së Qarkullimit Rrugor pranë NJPB Kavadar realizuan në territorin e Kavadarit një aktivitet parandalues me moton: “Vozitni sigurt me automjet të rregullt teknikisht”. Qëllimi i aktivitetit ishte ngritja e kulturës së komunikacionit, ndërsa theksi i veçantë u vu në ndërgjegjësimin e drejtuesve të automjeteve për detyrimin e mirëmbajtjes së rregullt dhe sigurimit të gjendjes teknike të automjeteve, si parakusht kryesor për pjesëmarrje të sigurt në trafik. Njësia për Parandalim pranë SPB Shkup, NJPB Berovë dhe Stacioni Policor për Sigurinë e Qarkullimit Rrugor në Shtip, zhvilluan gjithashtu aktivitete parandaluese në Shkup, Berovë dhe Shtip, ku drejtuesit e mjeteve u informuan për rëndësinë e respektimit të detyrueshëm të rregullave dhe rregulloreve të trafikut. Vëmendje e veçantë iu kushtua drejtuesve të motoçikletave, trotineteve elektrike dhe biçikletave, të cilët u rikujtuan për rregullat dhe detyrimet për pjesëmarrje të kujdesshme dhe të përgjegjshme në komunikacion, veçanërisht për detyrimin e mbajtjes së helmetës mbrojtëse. Në kuadër të këtyre aktiviteteve u shpërnda edhe material edukativ, i përgatitur në bashkëpunim me Këshillin Republikan për Siguri në Komunikacionin Rrugor dhe Fakultetin e Sigurisë në Shkup. Ndërkohë, nëpunës policorë të NJPB Makedonski Brod pranë SPB Manastir zhvilluan në fshatin Pllasnicë dhe në Makedonski Brod aktivitete parandaluese për parandalimin e zjarreve. Përmes komunikimit të drejtpërdrejtë me qytetarët, nëpunësit policorë theksuan nevojën për sjellje të përgjegjshme në natyrë, me theks të veçantë në shmangien e ndezjes së zjarreve, moshedhjen e bishtave të cigareve dhe detyrimin që, në rast se vërehet zjarr, të njoftohet menjëherë në numrin emergjent 112.
Bujqve u është theksuar nevoja për kryerjen me kujdes të punëve bujqësore, duke tërhequr vëmendjen ndaj rrezikut të shkaktimit të zjarreve nga djegia e kufijve, hamulloreve, barit të thatë dhe mbeturinave në ara. Gjithashtu, qytetarët u informuan se shkaktimi i zjarreve paraqet vepër penale dhe sanksionohet me ligj.
Në fund, u shpërnda material edukativ i përgatitur në bashkëpunim me Ndërmarrjen Publike “Pyjet Kombëtare”, me vërejtje për respektimin e ndalimit të lëvizjes në pyje, i cili mbetet në fuqi deri më 31.08.2026
