Sot (11.05.2026), nëpunësit policorë të SPB Kavadar realizuan aktivitet parandalues me temën “Përdor rripin e sigurisë”. Përmes komunikimit të drejtpërdrejtë, shoferëve iu theksua obligimi për përdorimin e detyrueshëm të rripit të sigurisë në automjete, si dhe respektimi konsekuent i të gjitha rregullave dhe rregulloreve të komunikacionit. Me këtë rast, u theksua se përdorimi i rripit të sigurisë është obligim ligjor si për drejtuesit e automjeteve, ashtu edhe për pasagjerët, me qëllim të rritjes së sigurisë personale.
Gjithashtu, nëpunësit policorë të SPB Negotinë realizuan një aktivitet parandalues me temën “Mbrohu nga vjedhjet”, duke i këshilluar qytetarët se si të mbrohen nga format e ndryshme të delikteve pronësore. Në kuadër të aktiviteteve u shpërnda edhe material i shtypur edukativ.
Seksioni për Parandalim pranë SPB Shkup, së bashku me nxënësit e SHFK “Grigor Përliçev” në territorin e komunës së Gazi Babës, zhvilloi një aktivitet edukativ lidhur me rolin e këmbësorëve në komunikacion dhe komponentët e tjerë të cilët ndërtojnë kulturën e komunikacionit tek fëmijët e asaj moshe. Me këtë rast, fëmijëve iu shpjeguan konceptet themelore të komunikacionit, rregullat dhe rregulloret, roli i nëpunësit policor në komunikacion, si dhe mënyra e ndërveprimit me qytetarët, të përshtatura sipas moshës së tyre.
Ndërkaq, nëpunësit policorë nga Stacioni Policor i Koçanit ua rikujtuan qytetarëve se nëse drejtojnë automjet nën ndikimin e alkoolit, rrezikojnë jo vetëm sigurinë e tyre personale, por edhe sigurinë e pjesëmarrësve të tjerë në komunikacion.
Në Shkollën Fillore Komunale “Vëllezërit Migjeni” në Tetovë, nëpunësit policorë nga Seksioni për Parandalim dhe Departamenti i Policisë pranë SPB Tetovë, së bashku me përfaqësues të Misionit të OSBE-së, realizuan një aktivitet edukativ në kuadër të fushatës për ngritjen e vetëdijes publike për parandalimin e keqpërdorimit të armëve të vogla dhe të lehta. Ligjërata edukative u realizua me qasje interaktive, ndërsa qëllimi është ngritja e vetëdijes tek popullata e re lidhur me pasojat dhe implikimet ligjore në rast se përfshihen në sjellje të tilla devijuese.
