Më 03.11.2026, nëpunës policorë të Stacioni Policor për Sigurinë e Komunikacionit Rrugor – Shtip realizuan aktivitet parandalues me temë „Parko me ndërgjegje – Parko me përgjegjësi“, me ç’rast drejtuesve të automjeteve dhe pjesëmarrësve në komunikacion iu bë apel që të parkojnë në mënyrë të drejtë dhe në përputhje me rregullat. Njëkohësisht, të gjithë drejtuesve të automjeteve iu bë apel që të drejtojnë me kujdes dhe të respektojnë rregullat dhe dispozitat e komunikacionit, ndërsa gjatë realizimit të aktivitetit u shpërndanë fletushka edukative.
Më 03.11.2026, nëpunës policorë të Stacionit Policor për Sigurinë e Komunikacionit Rrugor – Koçan realizuan ligjëratë edukative me temë „Mësoj, jap provimin, vozis“ në SHMK „Gosho Vikentiev“ në Koçan, për nxënësit e vitit të tretë dhe të katërt, me qëllim që ata të njihen me rregullat dhe dispozitat themelore të komunikacionit, rëndësinë e shenjave të caktuara të komunikacionit, si dhe me mënyrën e duhur të sjelljes si pjesëmarrës në komunikacion.
Më 03.11.2026, nëpunës policorë të NJPB Probishtip, në zonën qendrore të qytetit të Probishtipit, realizuan aktivitete parandaluese me temat „Drejto automjet teknikisht të rregullt“ dhe „Drejto në mënyrë të sigurt makineritë bujqësore“.
Në kuadër të aktivitetit të parë, nëpunësit policorë u shpërndanë drejtuesve të automjeteve fletushka edukative, të përgatitura nga Këshilli Republikan për Siguri në Komunikacionin Rrugor, me mesazhe për drejtim të përgjegjshëm të automjeteve dhe kontrollimin e rregullsisë së tyre teknike, me qëllim ruajtjen e sigurisë në komunikacion. Gjithashtu, qytetarët u informuan edhe për dispozitat ligjore që parashikojnë sanksione për drejtimin e automjeteve teknikisht të parregullta.
Në kuadër të aktivitetit të dytë, qytetarëve iu rikujtua se traktorët, makineritë bujqësore dhe rimorkiot duhet të jenë të regjistruara, teknikisht të rregullta dhe të shënuara në mënyrë përkatëse me ndriçim dhe materiale reflektuese pasive (shirita reflektues, katadioptra dhe të ngjashme). Gjithashtu, atyre iu bë apel që të respektojnë shenjat e vendosura të komunikacionit dhe kufizimet e shpejtësisë, si dhe u informuan për sanksionet që parashikohen për mosrespektimin e dispozitave ligjore. Pjesëmarrësve në komunikacion iu shpërndanë edhe materiale edukative të shtypura, të përgatitura nga Këshilli Republikan për Siguri në Komunikacionin Rrugor.
Qëllimi kryesor i aktiviteteve parandaluese është ngritja e kulturës së komunikacionit në drejtim të respektimit të rregullave, dispozitave dhe sinjalizimit të komunikacionit, si dhe forcimi i besimit dhe bashkëpunimit ndërmjet policisë dhe qytetarëve.
Më 03.11.2026, Njësia për Parandalim pranë SPB-së Shkup, në territorin e SPB-së Çair, Komuna e Butelit, SPB-së Kisella Vodë dhe SPB-së Aerodrom, realizoi tri punëtori edukative dhe një tribunë. Dy nga punëtoritë u realizuan me nxënësit e Klubeve për Parandalim, të përbërë nga nxënës të klasave të shtata deri në të nëntat nga SHFK „Petar Z. Pengo“ dhe SHFK „Panajot Ginovski“ në Komunën e Butelit, me temat „Parandalimi i dhunës ndërmjet bashkëmoshatarëve – bullizmit“ dhe „Parandalimi i varësive“.
Gjithashtu, me nxënësit e vitit të parë të SHMQSH „Vlado Tasevski“ u realizua tribunë me temë „Stop dhunës ndërmjet bashkëmoshatarëve dhe dhunës në ngjarjet sportive“.
Përmes komunikimit interaktiv, nxënësit u njohën me të gjitha format e dhunës, dhunën fizike dhe psikologjike, dhunën ndërmjet bashkëmoshatarëve – bullizmin dhe bullizmin kibernetik, format e sjelljes agresive ndërmjet të rinjve, si dhe me dukuritë antisociale dhe devijante – varësitë, të cilat seriozisht e rrezikojnë sigurinë e nxënësve.
Vëmendje e veçantë iu kushtua mënyrave të identifikimit, shmangies dhe raportimit të këtyre dukurive, si dhe kompetencave ligjore të zyrtarëve policorë dhe dispozitave ndëshkuese në përputhje me legjislacionin në fuqi, të përshtatura dhe të harmonizuara me moshën e nxënësve. Nxënësve të pranishëm iu shpërndanë edhe fletushka me mesazhe edukative: „Stop bullizmit – askush nuk meriton të ndihet i pavlerë dhe i pasigurt“. Nëpërmjet bashkëpunimit ndërinstitucional me Ambasadën e Parë të Fëmijëve „Megjashi“, në SHFK „Nevena Gjorgjieva – Dunja“, në territorin e SPB-së Kisella Vodë, u realizuan dy punëtori edukative me temë „Hapësirë e sigurt në internet për fëmijët dhe të rinjtë“, të orientuara drejt avancimit të mbrojtjes së fëmijëve, ngritjes së vetëdijes për sigurinë në internet, parandalimit të rreziqeve online dhe njohjes me mekanizmat për mbrojtjen e fëmijëve në mjedisin digjital.
Më 03.11.2026, nëpunës policorë të NJPB Kavadar realizuan ligjëratë edukative për nxënësit e klasës së nëntë në SHFK „Dimka Angelov Gaberot“ në Kavadar, me temë mbrojtjen nga dhuna ndërmjet bashkëmoshatarëve dhe dhuna kibernetike. Nxënësit u njohën me format e ndryshme të sjelljes së dhunshme, mënyrat e manifestimit të këtyre dukurive devijante, si dhe me pasojat që mund të shkaktohen prej tyre.
Nëpunës policorë të Njësisë Policore Çashkë, në territorin e Komunës së Çashkës, realizuan aktivitet parandalues me temë „Mbroje shtëpinë tënde“. Në kuadër të aktivitetit, përmes komunikimit të drejtpërdrejtë, qytetarët morën këshilla se si të mbrohen nga format e ndryshme të vjedhjeve, si t'i sigurojnë shtëpitë e tyre dhe si të tregojnë kujdes për sendet personale.
Nëpunës policorë të NJPB Negotinë realizuan aktivitet parandalues në komunikacion me temë „Mos përdor telefonin celular gjatë drejtimit të automjetit“. Me këtë rast, drejtuesve të automjeteve iu bë e ditur për rreziqet nga përdorimi i telefonit celular gjatë drejtimit të automjetit, si dhe për detyrimin e respektimit të vazhdueshëm të të gjitha rregullave dhe dispozitave ligjore. Qëllimi është drejtimi i sigurt dhe i përgjegjshëm i automjeteve, duke u kujdesur si për sigurinë personale, ashtu edhe për sigurinë e të gjithë pjesëmarrësve të tjerë në komunikacion. Në kuadër të aktiviteteve u shpërndanë edhe materiale edukative të shtypura.
Sot (03.11.2026), në Pikën Kufitare Bllacë e Poshtme u realizua aktivitet parandalues për siguri në komunikacion. Me këtë rast, nëpunës policorë të Stacionit Policor për Pikën Kufitare Bllacë e Poshtme pranë Qendrës Rajonale për Çështje Kufitare „Veri“, shtetasve të huaj që hynin në vend u shpërndanë fletushka me përmbajtje edukative, përkatësisht udhëzime për respektimin e rregullave dhe dispozitave të komunikacionit. Gjithashtu, ata u informuan edhe për funksionimin e sistemit „Qytet i Sigurt“.
