Sektori për Parandalim pranë SPB Kumanovë gjatë fundjavës zhvilloi disa fushata parandaluese. Në Pikën Kufitare Pellincë u realizua fushata “Ngisni të pushuar”, ku drejtuesve të automjeteve që kalonin tranzit në këtë zonë u bëri thirrje të tregojnë kujdes në komunikacion, të bëjnë pushime më të shpeshta gjatë udhëtimit, të respektojnë kufizimet e shpejtësisë sipas sinjalistikës rrugore dhe të mos hedhin bishta cigaresh nga dritaret e automjeteve.
Gjithashtu, drejtuesve të automjeteve iu shpërnda ujë për freskim dhe materiale informuese me udhëzime për një verë të sigurt, pa aksidente në komunikacion dhe pa zjarre.
Ndërkohë, së bashku me nëpunës policorë të Njësisë Policore të Nagoriçanit të Vjetër u zhvillua një patrullë parandaluese në disa fshatra të rajonit të Kozjakut, si dhe në vendet rekreative Qendra Memoriale ASNOM dhe Banja e Stërnovcit. Gjatë aktiviteteve, banorët u këshilluan të jenë të kujdesshëm gjatë punës në ara, me kombajna dhe traktorë, të mos djegin kashtën, mbeturinat apo barin e thatë në ara dhe oborre, me qëllim parandalimin e zjarreve të mëdha që mund të shkaktojnë dëme të konsiderueshme në pronën e qytetarëve.
Më 27.07.2026, Departamenti për Parandalim pranë SPB Shkup zhvilloi një fushatë parandaluese dhe edukative në territorin e Stacionit Policor Qendër me moton “Mos lini sende me vlerë në automjetin tuaj”. Qëllimi kryesor ishte rritja e kulturës së sigurisë tek qytetarët, si dhe forcimi i besimit dhe bashkëpunimit ndërmjet policisë dhe qytetarëve. Gjatë aktivitetit, drejtuesit e automjeteve u këshilluan që, kur largohen nga automjetet e tyre, të mos lënë sende me vlerë në vende të dukshme, në mënyrë që të mos bëhen objektiv i hajdutëve.
Po ashtu, sot në disa lokacione në Koçan dhe në Viniçë u zhvilluan aktivitete parandaluese me motot “Ngisni me përgjegjësi – mbani helmetë” dhe “Mos përdorni telefonin celular gjatë drejtimit të automjetit”. Pjesëmarrësve në komunikacion u bëri thirrje të drejtojnë automjetet me kujdes dhe të respektojnë rregullat dhe rregulloret e komunikacionit, ndërsa motoçiklistëve dhe drejtuesve të biçikletave dhe trotinetëve elektrikë iu theksua se mbajtja e helmetës mund t’u shpëtojë jetën. Gjatë aktivitetit u shpërndanë edhe fletushka me përmbajtje edukative
