Sot (27.06.2026), nëpunësit policorë të Qendrës Rajonale për Çështje Kufitare – Jug realizuan një aktivitet parandalues të orientuar në ngritjen e vetëdijes publike për mbrojtjen e natyrës dhe parandalimin e zjarreve, veçanërisht gjatë sezonit veror turistik dhe punimeve të korrjes.
Aktiviteti u zhvillua në Pikën Kufitare Stari Dojran, Pikën Kufitare Mexhitli dhe në territorin e Stacionit Policor për Mbikëqyrje Kufitare Markova Nogë, ku nëpunësit policorë komunikuan drejtpërdrejt me qytetarët dhe turistët, me ç'rast u theksua nevoja e sjelljes së përgjegjshme në natyrë, me theks të veçantë në shmangien e ndezjes së zjarrit në ambiente të hapura, moshedhjen e bishtave të cigareve dhe raportimin e menjëhershëm të çdo zjarri në numrin emergjent 112. Qytetarëve gjithashtu u shpërndanë fletushka edukative.
Aktivitet parandalues për mbrojtjen nga zjarret gjatë ditës së djeshme zhvilluan edhe nëpunësit policorë të Seksionit për Parandalim pranë SPB Kumanovë, të cilët mbajtën edhe takime koordinuese me bashkësitë lokale dhe institucionet e tjera, me qëllim të përballimit më efikas të kësaj dukurie.
Seksioni për Parandalim pranë SPB Kumanovë realizoi edhe një ligjëratë edukative në kopshtin e fëmijëve „Angel Shajçe“ në Kumanovë, me qëllim njohjen e fëmijëve me rregullat bazë të komunikacionit, të përshtatura sipas moshës së tyre.
Gjithashtu, në Kumanovë u realizua një aktivitet parandalues i dedikuar drejtuesve të motoçikletave, trotinetëve elektrikë dhe biçikletave, ku ata u rikujtuan për rregullat dhe detyrimet për pjesëmarrje të kujdesshme dhe të përgjegjshme në komunikacion, me theks të veçantë në detyrimin për mbajtjen e helmetës mbrojtëse.
