Dje dhe sot (16/17/06) në poligonin ushtarak ,,Krivollak’’, si dhe në selinë e komandës së Njësisë Speciale Antiterroriste - Tigrat, drejtori i Byrosë për Siguri Publike, Aleksandar Janev, mori pjesë në kryerjen e aktiviteteve stërvitore të pjesëtarëve të njësisë, realizimi i të cilave u organizua në kuadër të stërvitjes së përbashkët disajavore në të cilën, përveç pjesëtarëve të NJSA - Tigrat, morën pjesë edhe pjesëtarët e Batalionit të Forcave Speciale "Ujqërit" pranë Armatës së Republikës së Maqedonisë së Veriut, si dhe pjesëtarët e Forcave Speciale të Armatës së SHBA-ve, të njohura si "Beretat e Gjelbra".
"Jemi krenarë për profesionalizmin e njësive tona elitare, të cilat, krah për krah me partnerët e tyre të Armatës së SHBA-ve, shkëmbejnë përvoja dhe njohuri. Ky është një tjetër konfirmim i nivelit të besimit dhe bashkëpunimit që kemi me aleatët tanë strategjikë", tha drejtori Janev, duke theksuar se kjo stërvitje e përbashkët është në fakt pjesë e një programi më të gjerë për bashkëpunim ndërkombëtar dhe forcimin e ndërveprimit të forcave speciale, të organizuar me mbështetjen e Ambasadës Amerikane në Republikën e Maqedonisë së Veriut dhe Zyrës për Siguri Rajonale. Sipas Janev, këto janë aktivitete që jo vetëm forcojnë kapacitetin e forcave të sigurisë, por edhe nxisin lidhjen strategjike midis institucioneve të dy vendeve.
Trajnimi i ngjashëm i radhës është tashmë në fazën përgatitore dhe do të zbatohet në gusht të vitit 2025. Trajnimi do të synojë teknikat e përparuara kundër terrorizmit, me fokus në planifikimin dhe kryerjen e operacioneve komplekse në kushte të kërcënimeve reale të sigurisë. Siç theksoi drejtori Janev, Ministria e Punëve të Brendshme mbetet e përkushtuar për ndërtimin e një sistemi të sigurisë publike të qëndrueshëm, të sigurt dhe të pamposhtur, me një vizion të qartë për të ardhmen dhe një qasje partneriteti ndaj sfidave globale të sigurisë.
