Sot (01.10.2026), nëpunës policorë të Seksionit për Parandalim pranë SPB Veles dhe Seksionit për Parandalim pranë SPB Shtip, në Veles dhe Shtip zhvilluan aktivitete parandaluese për parandalimin e dhunës në familje. Përmes komunikimit të drejtpërdrejtë, qytetarët u informuan për dukuritë e dhunës në familje, si dhe për masat e mbrojtjes. Gjithashtu, u prezantuan procedurat dhe mënyrat e veprimit në rastet e këtij lloji, si dhe mundësia për të marrë ndihmë, mbrojtje dhe strehim të përkohshëm, me theks të veçantë në rëndësinë e raportimit në kohë të çdo forme të dhunës.
Nëpunësit policorë të Stacionit Policor Çashkë zhvilluan aktivitet parandalues për mbrojtjen e pyjeve nga prerjet e paligjshme, duke u theksuar qytetarëve se çdo veprim i kundërligjshëm do të sanksionohet në mënyrë përkatëse. Ndërsa në territorin e Negotinës dhe Gradskos u zhvilluan aktivitete parandaluese për mbrojtjen nga vjedhjet, gjatë të cilave qytetarët u informuan për mënyrat e rritjes së nivelit të sigurisë së tyre personale dhe të pronës.
Nëpunësit policorë të Njësisë Policore për Sigurinë e Komunikacionit Rrugor pranë SPB Kavadar dhe SPB Shtip, në Kavadar, Dellçevë, Sveti Nikollë dhe Koçan, zhvilluan aktivitetet parandaluese “Vendose rripin e sigurimit”, me qëllim që t’u bëhej e ditur si shoferëve, ashtu edhe pasagjerëve në automjete, detyrimi dhe nevoja për përdorimin e rripit të sigurimit, me qëllim rritjen e sigurisë në komunikacion. Në SHFK “Vëllazërim-Migjeni” në Tetovë, nëpunësit policorë të Seksionit për Parandalim pranë SPB Tetovë u shpjeguan fëmijëve mënyrën e lëvizjes së sigurt në komunikacion, përkatësisht si të udhëtojnë në mënyrë të sigurt nga shkolla në shtëpi dhe anasjelltas. Ndërkaq, në Berovë aktivitetet parandaluese ishin të fokusuara në pjesëmarrjen e sigurt në komunikacion të drejtuesve të trotinetëve elektrikë dhe biçikletave.
Në SHFK “Nikolla Karev” në Krushevë u zhvillua një ushtrim simulues për evakuim të shpejtë dhe sjellje në situata krize, përkatësisht një simulim tërmeti. Në kuadër të ushtrimit, nëpunësit policorë, në bashkëpunim me institucione të tjera, prezantuan masat për mbrojtje dhe shpëtim, si dhe mënyrën e veprimit të shërbimeve në terren në rast të një tërmeti të mundshëm. Qëllimi është që nxënësit të njihen me mënyrat dhe protokollet e sjelljes në situata krize, përkatësisht me evakuimin e organizuar në një situatë të simuluar.
Në SHFK “Mançu Matak” në Krivogashtan, u zhvillua një ligjëratë edukative për mbrojtjen nga varësitë.
