Sot (15.12.2025) nga Seksioni për Parandalim në SPB Veles dhe nëpunësit policorë të Stacionit Policor për Siguri në Komunikacionin Rrugor - Veles dhe Stacionit Policor për Siguri në Komunikacionin Rrugor - Koçan, në territorin e Velesit dhe Koçanit, u realizuan aktivitete parandaluese në fushën e sigurisë në trafik, për përdorimin e pajisjeve dimërore dhe mosdrejtimin e automjetit nën ndikimin e alkoolit. Nëpunësit policorë, në komunikim të drejtpërdrejtë, ua bënë të ditur shoferëve nevojën për të respektuar rregullat dhe rregulloret e trafikut, për hir të sigurisë personale, por edhe të sigurisë së të gjithë pjesëmarrësve të tjerë në trafik. Përveç kësaj, u theksua se në periudhën e dimrit, kushtet e rrugës kërkojnë kujdes maksimal dhe për këtë arsye përdorimi i pajisjeve dimërore është veçanërisht i rëndësishëm. Njëherësh, shoferëve iu shpërnda material edukativ i shtypur, i përgatitur nga Këshilli Republikan për Siguri në Komunikacionin Rrugor.
Nëpunësit policorë nga Qendra Rajonale për Çështje Kufitare Lindje dhe SPB Shtip, në bashkëpunim me një mjek nga IPSH "Goce Delçev" - Dellçevë dhe vullnetarë nga Kryqi i Kuq, në SHM "Metodija Mitevski-Brico", SHM "Vanço Përqe" në Dellçevë, SHM "Rade Kratovce" në Koçan dhe SHM "Kiril dhe Metodi" në Sveti Nikollë, mbajtën ligjërata me temë: "Mos përdorni mjete piroteknike", me qëllim informimin dhe ndërgjegjësimin e nxënësve që të mos përdorin këto mjete që mund të shkaktojnë pasoja të dëmshme për shëndetin e njerëzve dhe të shkaktojnë dëme materiale. Nxënësit u njoftuan edhe me sanksionet ligjore për shitjen dhe përdorimin e paligjshëm të piroteknikës.
