Ministria e Punëve të Brendshme, në bashkëpunim me Klinikën për Kirurgji Plastike dhe Rikonstruktive, po intensifikon fushatën parandaluese për ngritjen e vetëdijes publike rreth rreziqeve të përdorimit të pushkaliqeve dhe mjeteve të tjera piroteknike në prag të festave të fundvitit.
Të ftuara në një program televiziv, kryeshefja e Sektorit të Çështjeve Policore me Kompetenca të Përgjithshme, Biljana Saraginova Pançevska dhe drejtorja e Klinikës për Kirurgji Plastike dhe Rikonstruktive, Jasmina Georgievska Pavllovska, së bashku theksuan se përdorimi i pushkaliqeve paraqet një rrezik serioz për shëndetin, veçanërisht të fëmijëve dhe të miturve. Doktor Georgievska Pavllovska theksoi se çdo vit regjistrohen lëndime serioze, të cilat shpesh çojnë në pasoja të përhershme. Vitin e kaluar, tre fëmijë të moshës 12 dhe 13 - vjeçare pësuan lëndime serioze në duar, me amputime të gishtërinjve si pasojë e shpërthimeve të pushkaliqeve.
Saraginova Pançevska theksoi se MPB vazhdimisht rikujton se shitja dhe përdorimi i mjeteve piroteknike është i rregulluar në mënyrë strikte me ligj dhe se parashikohen gjoba të konsiderueshme për shkelësit. Një thirrje u bëhet gjithashtu tregtarëve që të përmbahen nga shitjet e paligjshme, si dhe prindërve që t'i kushtojnë vëmendje aktiviteteve të fëmijëve të mitur.
Aktivitetet parandaluese të MPB-së, të cilat zbatohen në shkolla në mbarë vendin, vazhdojnë edhe këtë vit. Përmes prezantimeve edukative, shembujve realë nga praktika mjekësore dhe paraqitjeve të përbashkëta me ekspertë mjekësorë, qëllimi është të ngritet vetëdija tek më të rinjtë për seriozitetin e rreziqeve që paraqesin pushkaliqet.
Ministria e Punëve të Brendshme u bën edhe një herë thirrje qytetarëve që të kalojnë periudhën e festave në paqe, siguri dhe dinjitet — pa përdorimin e piroteknikës që mund të shkaktojë lëndime të përhershme, zjarre ose prishje të rendit dhe qetësisë publike. Siguria e fëmijëve dhe shëndeti i të gjithë qytetarëve mbeten prioriteti ynë kryesor.