Sot dhe nesër, Policia e Maqedonisë organizon konferencën rajonale me temë "Faktori Njerëzor Përballë Teknologjisë në Mbledhjen e Provave Kundër Rrjeteve të Krimit me Rrezik të Lartë", e cila mbahet me iniciativën e Byrosë së Sigurisë Publike dhe Departamentit për Goditjen e Krimit të Rëndë dhe të Organizuar, me mbështetje financiare nga Projekti EU4FAST.
Në konferencë marrin pjesë përfaqësues të shërbimeve policore dhe prokurorive publike nga Belgjika, Sllovenia, Italia, Bullgaria, Serbia, Shqipëria, Mali i Zi, Kosova dhe Bosnja dhe Hercegovina, si dhe përfaqësues të Projektit EU4FAST, Europolit, Interpolit dhe agjencive partnere të sigurisë të pranishme në Republikën e Maqedonisë së Veriut.
Në fjalimin e tij, drejtori i Byrosë së Sigurisë Publike, Aleksandar Janev, theksoi se lufta kundër krimit të organizuar transnacional kërkon bashkëpunim të fortë dhe të konsiderueshëm ndërkombëtar.
"Në luftën kundër krimit të organizuar transnacional, besimi i ndërsjellë, bashkëpunimi i hapur dhe shkëmbimi i vazhdueshëm i informacionit dhe njohurive nuk janë një zgjedhje, por një domosdoshmëri. Vetëm përmes partneritetit të mirrëfilltë mund t'u përgjigjemi në mënyrë efektive kërcënimeve që nuk njohin kufij", theksoi drejtori Janev.
Ai theksoi se teknologjia është një aleat kryesor në hetimet moderne, por se zbatimi i saj duhet të jetë brenda një konteksti të qartë njerëzor dhe institucional.
“Teknologjia forcon provat, rrit sigurinë e nëpunësve policorë dhe mundëson monitorimin financiar dhe digjital të aktiviteteve kriminale. Megjithatë, pa kontekst njerëzor, të dhënat mbeten të paplota dhe pa mbështetje teknologjike, hetuesit janë të ekspozuar ndaj rrezikut të panevojshëm. Forca e zbatimit të ligjit modern qëndron në integrimin e disiplinuar dhe të përgjegjshëm të faktorit njerëzor dhe teknologjisë”, theksoi Janev.
Drejtori i BSP-së theksoi se suksesi i agjencive të zbatimit të ligjit nuk matet vetëm duke i privuar autorët nga liria e tyre, por duke ofruar aktakuza të qëndrueshme dhe vendime gjyqësore të formës së prerë.
“Lufta efektive kundër krimit të organizuar transnacional varet nga bashkëpunimi i hershëm, i vazhdueshëm dhe i strukturuar midis hetuesve dhe prokurorëve publikë. Partneriteti midis hetuesit dhe prokurorit është gurthemeli i një përgjigjeje institucionale të besueshme dhe efikase ndaj krimit”, tha Janev.
Në të njëjtën kohë, ai dërgoi një mesazh se hapja dhe partneriteti midis shteteve dhe institucioneve të zbatimit të ligjit do të thotë braktisja e qasjes së fragmentuar dhe ndërtimi i bashkëpunimit të vërtetë, të sinkronizuar dhe sistemik që synon strukturat e brendshme dhe nivelet e menaxhimit të rrjeteve kriminale.
“Me bashkëpunim të sinqertë, të përbashkët dhe në partneritet, rrjetet e krimit, strukturat dhe individët nuk duhet të ndihen kurrë të sigurt, të mbrojtur ose të paprekshëm askund”, porositi drejtori i Byrosë së Sigurisë Publike, Aleksandar Janev.
