Директорот на Бирото за јавна безбедност, Александар Јанев, учествуваше на Годишната конференција на Меѓународната асоцијација на шефови на полиции (IACP) во Орландо, САД, каде што оствари повеќе билатерални и мултилатерални средби со високи претставници на американските и регионалните безбедносни институции.
Во рамки на конференцијата, директорот Јанев оствари средби со Лесли Зиман, висока претставничка на Бирото за меѓународна борба против наркотици и спроведување на законот (INL), Грегори Дукот, директор на ICITAP, и Стив Филдс, помошник-директор на ICITAP при Министерството за правда на САД.
Во фокусот на разговорите беа продлабочувањето на стратешката соработка, јакнењето на институционалните капацитети и унапредувањето на оперативната ефикасност преку побрза размена на информации, современи истражни методи, аналитичка обработка на податоци и можности за формирање заеднички оперативни тимови.
Посебен акцент беше ставен на зајакнувањето на меѓународната полициска соработка во борбата против организираниот и транснационалниот криминал. Директорот Јанев размени искуства и информации со полициски директори и високи претставници на безбедносните институции од регионот и пошироко, при што беше истакната важноста на меѓусебната доверба, координацијата и заедничкото оперативно дејствување.
Директорот Јанев оствари средба и со мајор Роберт Анзуето од Канцеларијата на шерифот Џон Мина на округот Оринџ, на која се разговараше за современите полициски практики, соработката со граѓаните и примената на новите технологии во полициското работење.
Во рамки на конференцијата, Јанев го посети и изложбениот дел, каде што се запозна со најновите решенија во областа на дигиталните технологии, вештачката интелигенција и безбедносната опрема, како можности за натамошна модернизација на македонската полиција.
Учеството на конференцијата претставува значаен придонес кон зацврстување на меѓународните партнерства, унапредување на оперативната соработка и јакнење на капацитетите за справување со современите безбедносни предизвици.
