Почитувани читатели,
Свесен за важноста и значењето на научно-стручната основа во современото полициско работење, го претставувам деветтиот број на Меѓународното научно списание „Безбедност“. Во време кога безбедносните предизвици стануваат сè покомплексни и подинамични, темелното истражување, анализата и академската дискусија се клучни алатки за успешно справување со истите.
Како министер за внатрешни работи, мојата заложба е јасна – силно ќе ја поддржувам интеграцијата на научната мисла во сите сегменти на полициското работење. Визијата што ја застапувам подразбира создавање на инклузивен интелектуален простор, во кој полицијата и науката ќе соработуваат преку заеднички научно-истражувачки активности, системски анализи и развојни проекти. Овој пристап ќе овозможи креирање политики и стратегии кои не се само реактивни, туку и проактивни, со цел да се предвидат и спречат идните безбедносни закани.
Списанието „Безбедност“ со својата традиција претставува значајна алатка за спојување на научната мисла и полициската практика. Наша амбиција е ова списание не само да ја задржи својата позиција како респектабилна платформа за стручни и научни трудови, туку и да прерасне во еминентно меѓународно научно списание, достојно да биде дел од престижните меѓународни научни бази.
Тоа ќе ни овозможи поширок опсег на соработка, зголемена видливост на научните трудови и отвореност за нови перспективи и идеи кои ќе бидат применети во секојдневното работење на полицијата.
Ги охрабрувам сите професори, истражувачи и практичари од областа на безбедноста со своите знаења и експертиза да придонесат во унапредувањето на ова списание. Вашиот придонес не само што ќе го збогати научниот корпус, туку и ќе придонесе за подобрување на оперативните процедури и стратешките пристапи во полициското работење.
Сигурен сум дека овој број на списанието ќе претставува значаен чекор напред во градењето на модерна, ефикасна и транспарентна полициска служба, а неговата содржина ќе послужи како темел за идни иницијативи и стратегии кои ќе го обликуваат полициското работење во годините што доаѓаат.
Со почит,
Панче Тошковски
Министер за внатрешни работи
Претседател на Меѓународниот уредувачки одбор на Меѓународното научно списание „Безбедност“
