Денеска (01.08.2025) министерот за внатрешни работи Панче Тошковски го посети Полициското одделение за безбедност на патниот сообраќај во Гостивар, со цел непосредно да се запознае со состојбата на терен и изнаоѓање на решение за проблемот за кој постојано пристигнуваат реакции од граѓаните, а се однесува на застојот и гужвите кои се создаваат кај семафорот на излезот од Гостивар, на потегот кон Охрид, особено во летната сезона и за време на викендите. “Веднаш се преземени мерки и воведен е посебен режим на сообраќај за време на викендите и во периодите со зголемен интензитет на сообраќај, со цел да се овозможи побрз и побезбеден проток на возилата и да се минимизираат метежите.
Истовремено, свесни сме дека за трајно и системско решавање на овој проблем ќе бидат потребни и соодветни инфраструктурни прилагодувања, за кои институциите треба да делуваат заеднички и навремено”, истакна министерот Тошковски. МВР продолжува и понатаму со внимателно следење на реалните потреби на граѓаните и со конкретни мерки таму каде што се потребни.
