Раководството на СВР Скопје учествува на меѓународната конференција „Capital Policing Europe Conference – CPEC“, која се одржува во Хелсинки, Финска.
На дводневната конференција учествуваат шефови на полиции од европските главни градови, претставници на Европол, како и претставници на повеќе европски безбедносни институции.
Главни теми на овогодинешната конференција се борбата против нелегалната трговија со дрога и нарко-тероризмот, како и справувањето со сајбер-криминалот, кои претставуваат едни од најсериозните безбедносни предизвици на современото општество.
Во рамки на конференцијата се реализираат презентации и работни сесии посветени на актуелните состојби, искуствата и предизвиците со кои се соочуваат европските полиции, со посебен акцент на потребата од засилена меѓународна координација, размена на информации и заеднички пристап во справувањето со организираниот и транснационалниот криминал.
На затворањето на конференцијата, шефовите на полиции од европските главни градови ќе потпишат заедничка декларација за продлабочување на меѓународната полициска соработка и заедничко дејствување во борбата против транснационалниот криминал.
