Директорот на Бирото за јавна безбедност при Министерството за внатрешни работи, Александар Јанев, денес го предводеше македонскиот тим на регионалниот стратешки состанок одржан во Тирана, Албанија, организиран и поддржан од агенциите за спроведување на законот на Обединетото Кралство.
Фокусот на состанокот беше насочен кон справување со предизвиците поврзани со нелегалната миграција, прекуграничниот криминал, дејствувањето на организираните транснационални групи и нелегалните финансиски текови – области кои претставуваат клучни фактори за стабилноста и безбедноста на целиот регион.
Учесниците усвоија значајни заклучоци и предложија нови регионални иницијативи, модели на меѓусебна соработка и оперативни механизми, со цел дополнително зајакнување на колективната подготвеност на земјите од регионот. Во фокус останува превенцијата на криминалот на национално, регионално и меѓународно ниво, навременото детектирање и сузбивање на криминалните мрежи, како и создавање поотпорен, побезбеден и постабилен регион.
Директорот Јанев истакна дека обезбедувањето сигурност за секој граѓанин, без разлика каде во регионот престојува или се движи, е врвен приоритет.
Македонската полиција и понатаму останува препознатлив, доверлив и рамноправен партнер во напорите за јакнење на регионалната и европската безбедност, активно придонесувајќи кон воспоставување стабилни механизми на соработка кои создаваат трајна заштита и безбедност.
