Денеска (25.02) директорот на Бирото за јавна безбедност, Александар Јанев, во рамки на работната посета на Регионалниот центар за гранични работи – Југ, присуствуваше на доделувањето сертификати на полициски службеници кои успешно ја комплетираа втората внатрешна обука спроведена во рамки на Министерството за внатрешни работи.
Обуката беше реализирана од сертифицирани обучувачи – полициски службеници од Одделот за сузбивање на организиран и сериозен криминал, со поддршка на проектот на Европската Унија за владеење на правото, преку кој беше овозможено и стручно оспособување на обучувачите од страна на словенечката полиција.
Со стекнатите знаења и вештини, полициските службеници ќе можат поефикасно да користат софистицирани технички средства и воздухоплови без екипаж (дронови), што ќе придонесе за унапредување на безбедноста на јужната граница и поуспешно справување со сите облици на прекуграничен криминал.
Директорот Јанев им честиташе на учесниците за успешно завршената обука, нагласувајќи дека континуираната едукација и јакнењето на професионалните капацитети се клучни за ефикасно и современо работење на полицијата во насока на заштита на безбедноста на граѓаните и државната граница.
