Во периодот од 27 до 28 ноември, висока делегација од Министерството за внатрешни работи учествуваше на 19-тата Министерска конференција на Помпиду групата на Советот на Европа, која се одржа во Стразбур.
Конференцијата ги обедини високите претставници од земјите членки со цел разгледување на најновите предизвици во политиките за дроги и зависности, оценување на резултатите од Работната програма 2023–2025, како и усвојување на новата работна рамка за периодот 2026–2029.
Делегацијата на Министерството активно учествуваше во дискусиите поврзани со борбата против организираниот криминал и меѓународните мрежи за трговија со дрога, дигиталните ризици, како и потребата од засилена меѓународна координација и размена на информации.
На конференцијата беше усвоена и Министерската декларација, со која земјите членки ја потврдија својата заложба за унапредување на регионалната и меѓународната соработка, развој на современи политики засновани на докази и посебен фокус на заштитата на децата и ранливите категории.
Министерството за внатрешни работи останува цврсто посветено на усогласувањето со европските стандарди, унапредувањето на националните политики за превенција и борба против дрогата, како и на јакнењето на партнерствата со меѓународните организации.
