Заменик министерот за внатрешни работи Астрит Исени учествуваше на 10. јубилејна Регионална конференција за безбедносна координација во Западен Балкан, што се одржува денеска и утре (11/12.11.2025) во Скопје, во организација на Советот за регионална соработка (RCC), со поддршка од Министерството за надворешни работи и Министерството за внатрешни работи на Италијанска Република, и во партнерство со Владата на Република Северна Македонија.
Во своето обраќање, заменик министерот Исени ја истакна важноста на регионалната соработка во справувањето со заедничките безбедносни предизвици, како и посветеноста на Министерството за внатрешни работи кон унапредување на довербата во институциите, транспарентноста и ефикасноста во работењето. Тој нагласи дека стабилен и безбеден Западен Балкан е предуслов за европска интеграција и долгорочна стабилност на целиот континент.
Заменик министерот нагласи дека реформите мора да бидат видливи, мерливи и транспарентни со јасни политики, поефикасна истрага, силни механизми за внатрешен надзор, независен правосуден интегритет и реална полициска одговорност.
На конференцијата имаше високи претставници од владите на регионот, меѓународни партнери, експерти и претставници на граѓанското општество, со цел размена на искуства, добри практики и зајакнување на заедничките безбедносни политики.
