Заменик министерот за внатрешни работи Астрит Исени денеска се обрати на отворањето на Основната практична обука за Единиците за контрола на аеродроми (Airport Control Units – ACU), која се реализира во рамки на Заедничката акција на Европската Унија и Канцеларијата на Обединетите нации за дрога и криминал (UNODC) преку Програмата за контрола на контејнери и патници (Container Control Programme – CCP/PCCP).
Во своето обраќање, Исени изрази благодарност до Европската Унија и UNODC за континуираната поддршка и партнерство во зајакнувањето на институционалните капацитети на национално и регионално ниво, нагласувајќи дека ваквите обуки имаат суштинско значење за градење поефикасни и поотпорни системи за справување со современите безбедносни закани.
„Оваа обука претставува успешен пример како преку заедничка работа, поддршка и размена на знаења ги зајакнуваме капацитетите на службениците кои се на првата линија во борбата против сите форми на криминал. Стекнатите вештини и практични знаења ќе придонесат за поголема оперативна ефикасност, подобра координација и поуспешно откривање и спречување на криминални активности“, истакна Исени.
Тој нагласи дека практичната обука има особена вредност бидејќи овозможува стекнување конкретни оперативни искуства и дополнително ја унапредува соработката меѓу полициските и царинските служби, додека присуството на учесници од повеќе земји од регионот претставува значајна можност за размена на добри практики и зацврстување на регионалното партнерство.
Осврнувајќи се на актуелните безбедносни предизвици, заменик министерот посочи дека транснационалниот организиран криминал, трговијата со дрога, криумчарењето мигранти, трговијата со луѓе и нелегалниот транспорт на оружје бараат координиран, професионален и одлучен одговор од сите надлежни институции.
„Аеродромите претставуваат клучни транспортни и логистички јазли, но истовремено и потенцијално ранливи точки кои можат да бидат злоупотребени од организираните криминални групи. Затоа, развојот на современи механизми за анализа на ризик, јакнењето на безбедносните капацитети и унапредувањето на меѓуинституционалната и меѓународната соработка се од суштинско значење за навремено откривање и спречување на безбедносните закани“, потенцираше Исени.
На крајот од своето обраќање, тој ја реафирмираше посветеноста на Министерството за внатрешни работи кон унапредување на безбедноста, владеењето на правото и развојот на професионални и модерни гранични служби кои работат согласно највисоките европски и меѓународни стандарди, нагласувајќи дека МВР ќе продолжи активно да придонесува во реализацијата на заедничките проекти насочени кон борба против организираниот криминал и зајакнување на регионалната безбедност.
