Денеска (06.11.2026), директорот на Бирото за јавна безбедност, Александар Јанев, во Охрид одржа работна средба со раководителите на Секторите за внатрешни работи Охрид, Тетово и Битола, Регионалните центри за гранични работи Југ и Запад, како и со раководителите на униформираната полиција, командирите на полициските станици и раководителите на полициските одделенија.
На средбата беа разгледани актуелните безбедносни состојби, оперативните приоритети и насоките за унапредување на полициското работење, со посебен акцент на засилено полициско присуство на терен, поактивна превенција и јакнење на партнерството со граѓаните и локалната заедница.
Јанев ја истакна важноста на одговорноста и лидерската улога на средното раководно ниво, како и потребата од поголема координација, професионалност и конкретни резултати во работењето на сите организациски единици.
Во рамки на средбата беа презентирани и новите интервентни единици, како и дигиталните алатки и работната верзија на новата дигитална платформа за полициското работење, која претставува значаен чекор кон целосна дигитализација, поефикасна размена на информации, подобра координација и управување со полициските ресурси.
„Полицијата не е тука да владее со граѓаните, туку да им служи. Таа мора да биде нивен партнер, нивна сигурност и еден од столбовите на безбедноста“, порача Јанев.
Целта е изградба на модерна, мобилна, ефикасна и професионална полиција, со јасен систем на одговорност, силни институционални вредности и капацитети подготвени да одговорат на безбедносните предизвици на новото време.
