Денеска (13.05.2026) во Приштина, директорот на Бирото за јавна безбедност Александар Јанев го предводи македонскиот тим на регионалниот стратешки состанок организиран и поддржан од агенциите за спроведување на законот на Обединетото Кралство, платформа која претставува силен пример за партнерство, доверба и заедничка посветеност кон безбедноста на регионот.
Фокусот на денешните дискусии е насочен кон предизвиците кои произлегуваат од нелегалната миграција, прекуграничниот криминал, организираните транснационални криминални мрежи и нелегалните финансиски текови, појави кои директно влијаат врз националните криминални структури и безбедноста на државите во регионот.
Во тас насока се зборуваше за унапредување на размената на информации, заеднички анализи, координирани активности на терен и создавање механизми што ќе овозможат навремено предвидување, детектирање, превенирање и проактивно сузбивање на криминалните појави.
Се очекува да бидат усвоени значајни заклучоци и предложени нови регионални иницијативи и оперативни модели на соработка кои дополнително ќе ја зајакнат колективната подготвеност и отпорност на институциите.
На маргините на состанокот, директорот Јанев оствари и билатерална средба со новоназначениот директор на албанската полиција, на која се потврди определбата за продолжување и унапредување на соработката во сите аспекти на полициското работење. Посебен акцент е ставен на претстојната летна сезона, со цел овозможување побрз и поефикасен проток на граѓаните преку граничните премини.
„Нашата визија останува јасна – отворена, силна и искрена регионална соработка која ќе придонесе за превенција и сузбивање на криминалот, навремено откривање и разбивање на криминалните мрежи и создавање побезбеден и постабилен регион за сите граѓани“, истакна директорот Јанев.
Македонската полиција останува доверлив, професионален и рамноправен партнер кој активно придонесува кон јакнењето на регионалната и европската безбедност, градејќи мостови на соработка што обезбедуваат долгорочна стабилност, сигурност и заштита.
