Вчера (18.02) од страна на полициски службеници при ОВР Неготино, на подрачјето на општината Неготино, беше реализирана превентивна активност под мотото - „Стави појас,вози одговорно“, а со цел зголемување на безбедноста при патување со возило и подигање на свеста за употреба на сигурносните појаси од страна на возачите и патниците.
Притоа, во разговорите со учесниците во сообраќајот, полициските службеници ги нагласија законските обврски, но и санкции околу задолжителното користење на појас во возилата, а особено беше потенцирана значајната заштитна улога која ја има сигурносниот појас при евентуално случена сообраќајна незгода. Воедно, полициските службеници апелираа за доследно почитување на сите сообраќајни правила и прописи, а во рамки на превентивната активност на возачите покрај укажувањата, им беше поделен и едукативен печатен материјал, изработен од страна на Републичкиот совет за безбедност на сообраќајот на патиштата.