Вчера (12.12.) полициски службеници од Отсекот за превенција при СВР Тетово на подрачјето на Тетово спроведоа активности за превенција и спречување на неовластено пуштање во промет и употреба на пиротехнички средства.

Имено, во пресрет на претстојните празници, на граѓаните им беше укажано дека продавањето, односно купувањето и активирањето на пиротехника на јавни места, на улица, во дворови, влезови на станбени згради и слично, претставува законски прекршок, за кој согласно член 31 од Законот за прекршоци против јавниот ред и мир е предвидена глоба од 100 до 250 евра во денарска противвредност.

Исто така, на граѓаните им беше посочено дека набавувањето и дистрибуирањето на пазарот во поголеми количини е спротивно на Кривичниот законик на РСМ и за тоа дело е предвидена казна затвор. Полициските службеници укажуваа дека ќе бидат санкционирани и сите оние кои на јавно место неовластено приредуваат огномети или слични приредби и не ги преземат потребните заштитни мерки согласно соодветната законска регулатива, како и оние кои со огнено оружје пукаат на свадбени или други семејни свечености.