Денеска (29.10.) од страна на полициски службеници од Отсекот за превенција при СВР Штип, на Градскиот стадион во Штип беше спроведена превентивна активност во рамки на проектите – „МВР за граѓаните“ и „Да навиваме спортски и безбедно за нашиот клуб“.
Во текот на активностите беа поделени летоци со едукативна содржина, а на граѓаните им беше укажано за забраната за внесување на алкохол, опојни средства, и истакнување на транспаренти, знамиња и други предмети со текст, слики, знак или други обележја или пак пеење на песни или дофрлување со пораки коишто предизвикуваат и потикнуваат омраза или насилство врз основа на расна, национална или верска припадност. Исто така, на граѓаните им беа укажани и основните законски одредби за спречување на насилство и недостојно однесување на спортски натпревари, а стана збор и за начините на препознавање и потребата од навремено пријавување на потенцијалните инциденти.
Целта на активноста беше подигање на свеста кај граѓаните за создавање на побезбедна и сигурна заедница.