Денеска (28.09.) во Тетово полициски службеници од СВР Тетово одржаа средба со директорите на шесте тетовски средни училишта, потоа одговорните за образование во тетовската локална самоуправа, како и претставници од советите на родители. На состанокот кој претставува планирана активност на Секторот во рамки на превентивните активности за непречено и безбедно одвивање на наставата во овие училишта, но и за поединечна и заедничка безбедност на учениците надвор од училиштата, беше оценето дека учебната година започнала без безбедносни инциденти или други проблеми од таква природа и карактер. Директорите на училиштата искажаа позитивни оценки за досегашната соработка и присуство на полицијата во насока на покривање на објектите, како и на местата на кои најчесто престојуваат учениците во текот на училишните одмори или по завршување на наставата.

Од претставниците на СВР Тетово беше побарана и редовна двонасочна соработка со советите на родители во детектирањето и третирањето на евентуалните девијантни појави меѓу учениците во училиштата, пред се кога станува збор за користење на наркотични средства, врсничко насилство и слично. Ваква средба која беше иницирана од Отсекот за превенција на СВР Тетово идната недела планирана е да се одржи и во Гостивар, со цел координирано да се следат состојбите во училиштата и да се преземаат потребните превентивни и други мерки, а се во интерес на безбедни училишни средини и безбедност на самите ученици.