Полициски службеници од Одделението за внатрешни работи Прилеп при СВР Битола вчера (20.03.) во Прилеп, во рамки на кампањата “Безбедни училишта“ реализираа едукативна работилница во основните училишта “Рампо Левката“ и “Кочо Рацин“, посветени на темите поврзани со врсничкото насилство.

Притоа, полициските службеници на учениците од овие основни училишта им ги презентираа основните информации поткрепени и со практични полициски искуства околу појавата на врсничкото насилство во и надвор од училиштата, формите под кои се појавува и се манифестира. Особено внимание на работилниците се посвети и на начините за превенирање на оваа социо-девијантна појава која може да има и сериозни законски последици, од аспект на малолетничката деликвенција.

Покрај ова, вчера, едукативна работилница беше одржана и во државното средно училиште “Мирче Ацев“ во Прилеп каде што полициски службеници ги информираа средношколците за компјутерските злоупотреби, сајбер булингот, говорот на омраза и како да се заштитат од ваквите појави.