Во рамките на планираните превентивни активности на СВР Тетово за овој период од годината, полициски службеници од Отсекот за превенција денеска (1 ноември) го посетија гостиварскиот голем пазар и остварија непосредни средби со продавачите и граѓаните-купувачи на најразлични, пред се земјоделски производи. На средбите им беше објаснето и советувано да внимаваат на нивните паричници и други вредни предмети кои ги носат со себе, зa да се заштитат од џепни кражби.

На граѓаните, исто така, им беше укажано и да бидат претпазливи во контакти со непознати лица кои на и околу пазарите им нудат производи со сомнително потекло и квалитет, но и разни други услуги. Вакви средби ќе бидат реализирани и на другите пазари на поширокото полошко подрачје, во функција на подобрување на вкупната безбедност и намалување на имотните деликти и измамите.