Одделението за превенција при СВР Скопје во соработка со полициски службеници од ПСОН Ѓорче Петров денеска (04.03.) во основните општински училишта „Димитар П.Ѓ. Беровски“ и „Мирче Ацев“ реализираше две едукативни работилници со ученици од училишните клубови за превенција на темата „Превенција од зависности“. Говорејќи за зависностите, преку практични полициски искуства и наменски подготвена видео презентација, учениците – членови на клубовите за превенција беа информирани за разните видови на зависности, кои се често се генератор на агресивност, насилство и криминал. Исто така, децата беа запознаени како да се превенираат зависностите, при што беше нагласено дека прв и најважен чекор е информираноста и едукацијата.
Покрај ова, Одделението за превенција реализираше превентивна активност и во ЈУГД „Весели Цветови“ – објект Кокиче со дечиња од предучилишна возраст на тема – „Запознавање со професијата полицаец“. На едукативно превентивната работилница присуствуваа дечиња од четири до шестгодишна возраст, на кои соодветно за нивната возраст, им беа појаснети основните должности и активности на полицискиот службеник односно полицијата, со фокус на оние домени на работа кои се интересни и секако важни за децата – како сообраќајот, заштитата, безбедноста на луѓето и слично.