Денеска (20.07) Отсекот за превенција при СВР Битола и општинската организација на Црвениот крст- Битола се вклучија во дополнителни активности за превенција на населението од актуелниот топлотен бран. На граѓаните на Битола им беше прикажано, преку мала симулациска вежба, како да се заштитат од топлотен бран и последиците од екстремно високите температури.

Покрај тоа беа поделени и летоци со цел подобра превенција и зачувување на здравјето.
Во текот на вчерашниот ден пак од страна на полициски службеници од Македонски Брод во село Црешнево беше реализирана превентивна активност со месното население со посебен акцент за заштита од пожари на отворен простор и шумски простор ,а исто така им беше објаснета и законската обврска при сторување на кривичното дело.

Одделенијата за внатрешни работи Крушево и Ресен, на своите подрачја исто така реализираа превентивни активности. Така, полициски службеници ОВР Крушево во рамки на кампањата „Безбедно лето 2023“, во непосредна комуникација со граѓаните информираа и укажуваа на превенцијата од кражби и тешки кражби во домовите, а беа поделени и информативни летоци со содржини поврзани со превенцијата од имотни деликти. Додека пак полициски службеници од ОВР Ресен вчера реализираа превентивна активност под мотото - „Заштита од топлотниот бран“, на излезите од градот на возачите покрај практичните совети за самозаштита од високите температури и екстремниот УВ индекс на зрачење им беа поделени летоци со едукативна содржина со корисни совети за заштита и препораки од правење на подолги паузи при патување и заштита од високите температури во овој период од годината.
Покрај ова и полициски службеници од Полициската станица за безбедност на патниот сообраќај при СВР Битола во текот на вчерашниот ден спроведоа активности во битолските села Доленци и Кажани во делот на законската обврска којашто ја имаат сопствениците на земјоделска механизација, пред се околу заштитната светлосна сигнализација и осветлување.