Полициски службеници од Полициското одделение за безбедност на патниот сообраќај при ОВР Кочани во текот на вчерашниот ден на неколку улици во централното градско подрачје во Кочани, спроведоа превентивна активност под мотото – „Паркирај совесно, паркирај одговорно“, со цел поголема безбедност на пешаците, децата, велосипедистите и сите учесници во сообраќајот.
Полициските службеници во непосредна комуникација со граѓаните укажуваа на повеќе важни факти како што се потребата од прописно паркирање во интерес на пешаците и велосипедистите, овозможување видливост и проточност како за сообраќајната сигнализација така и за пешачките премини, велосипедските премини, крстосниците. Покрај ова во рамки на активноста на граѓаните им беа делени печатени едукативни материјали изработени во соработка со Републичкиот совет за безбедност на сообраќајот на патиштата со информативни содржини во интерес на личната и генералната безбедност во сообраќајот