Отсекот за превенција при СВР Охрид денеска (17.05.2023) реализираше работни средби со одговорни лица во угостителски објекти во Охрид каде се најавени матурски прослави, а во насока на укажување околу доследно почитување на работно време и навремено превенирање на евентуално нарушување на јавниот ред и мир. Оваа средба доаѓа како континуитет на активностите околу превентивната кампања за безбедни матурски прослави, во рамки на која што Отсекот за превенција при СВР Охрид завчера одржа и повеќе работни средби со директорите и стручните служби од средните училишта на подрачјето на Охрид – „Св.Наум Охридски“, „Св.Климент Охридски“, „Св.Кирил и Методиј“ и „Ванчо Питошески“, а во врска со престојните матурски прослави во контекст на нивно безбедно и мирно одвивање. Притоа, од страна на полициските служби беше укажано преку претседателите на класовите од четврта година и советите на родители, матурантите да ги почитуваат законските правила и прописи и од областа на сообраќајот и од областа на јавниот ред и мир.

Исто така, денеска Отсекот за превенција спроведе и активности од превентивна кампања „И јас и ти сме пешаци“, што се реализира во соработка со РСБСП при што на граѓаните на повеќе локации во Охрид им беа делени информативни летоци и пропагандни материјали а се со цел зголемување на свеста на пешаците како рамноправни учесници во сообраќајот.

Инаку, и вчера Отсекот за превенција при СВР Охрид одржа едукативно предавање за учениците – матуранти од средните училишта од Струга – „Ибраим Темо“ и „Нико Нестор“ а на истата тема околу безбедните матурски прослави. На предавањето реализирано со матурантите беа презентирани сообраќајните правила и прописи при што учениците беа запознаени со последиците од непочитување на законските правила и прописи како во делот на сообраќајот така и делот на јавниот ред и мир за време на одржување на матурските прослави.