Денеска (24.04.2023) Отсекот за превенција при СВР Велес во соработка со Полициската станица за безбедност на патниот сообраќај Велес, како и Локалниот совет за превенција при општина Велес, ја започнаа заедничката превентивна кампања фокусирана за возачите на мотори на подрачјето на овој сектор за внатрешни работи.
Целта на оваа кампања е подигнување на сообраќајната култура на возачите на мотори во сообраќајот во град Велес, а е реализира под мотото “Носи кација, вози внимателно“ и пред сѐ е насочена кон помладите категории граѓани кои се, всушност, и во најголем број возачи на мотори.

Дополнително, сообраќајно воспитна активност е насочена кон возачите на мотори, бидејќи токму во претстојниот временски период зголемен е бројот на овие учесници во сообраќајот во градот.
Денеска на повеќе локации во градот Велес полициските службеници укажуваа на потребата овие превозни средства да бидат соодветно означени и технички исправни, а возачите на мотори да ги почитуваат сообраќајните правила и прописи и задолжително да носат зашититен шлем или кацига.

Покрај усното укажување на возачите на мотор околу правилата и прописите на ваквиот вид учесници во сообраќајот на истите им беше делен и соодветен печатен едукативен материјал, со корисни совети за возачите на мотори изработен од Отсекот за превенција при СВР Велес и Локалниот совет за превенција при општина Велес.