Во рамки на континуираните превентивни активности на Одделението за превенција при СВР Скопје вчера (25.02.) во објектите на “СОС Детско село“ во населбата Влае и во селото Бардовци, скопско со децата и младите во оваа установа беа реализирани две едукативни работилници, а во врска со темите за зависностите и за трговија со луѓе. Во текот на работилниците младите згрижени во оваа установа преку презентацијата на полициските службеници беа запознати со проблематиката на овие криминогени појави и како да се заштитиме од нив.
Исто така, во текот на вчерашниот ден Одделението за превенција при СВР Скопје во соработка со Републичкиот совет за безбедност на сообраќајот на патиштата, реализираше сообраќајни превентивни активности во рамки на кампањата – “Биди одговорен – не користи мобилен телефон додека возиш“.
Така, на неколку локации на улицата “Беласица“ во општината Гази баба во непосредна комуникација со граѓаните, пред се со возачите, од страна на полициските службеници беше укажувано на неопходноста од почитување на сообраќајните правила и прописи заради општата безбедност на сите учесници во сообраќајот. На граѓаните им беа делени едукативни печатени материјали на посочената тема а изработени со поддршка на РСБСП.